(Bal-e-Jibril-017) (سما سکتا نہیں پہناے فطرت میں میرا سودا) Sama Sakta Nahin Pehna’ay Fitrat Mein Mera Soda

سما سکتا نہیں پہنائے فطرت میں مرا سودا

ما از پے سنائی و عطار آمدیم
سما سکتا نہیں پہنائے فطرت میں مرا سودا
غلط تھا اے جنوں شاید ترا اندازہ صحرا

خودی سے اس طلسم رنگ و بو کو توڑ سکتے ہیں
یہی توحید تھی جس کو نہ تو سمجھا نہ میں سمجھا

نگہ پیدا کر اے غافل تجلی عین فطرت ہے
کہ اپنی موج سے بیگانہ رہ سکتا نہیں دریا

رقابت علم و عرفاں میں غلط بینی ہے منبر کی
کہ وہ حلاج کی سولی کو سمجھا ہے رقیب اپنا
حلاج: دھونیا؛ جو شخص عام طور پر منصور کے نام سے معروف ہے، اس کا نام حسین بن منصور تھا؛ کیونکہ اس کا باپ روئی دھونکتا تھا اسی وجہ سے حلاج مشہور ہوا۔
خدا کے پاک بندوں کو حکومت میں، غلامی میں
زرہ کوئی اگر محفوظ رکھتی ہے تو استغنا
استغنا: بے نیازی، سیر چشمی۔
نہ کر تقلید اے جبریل میرے جذب و مستی کی
تن آساں عرشیوں کو ذکر و تسبیح و طواف اولی!

بہت دیکھے ہیں میں نے مشرق و مغرب کے میخانے
یہاں ساقی نہیں پیدا، وہاں بے ذوق ہے صہبا
صہبا: شراب۔
نہ ایراں میں رہے باقی، نہ توراں میں رہے باقی
وہ بندے فقر تھا جن کا ہلاک قیصر و کسری

یہی شیخ حرم ہے جو چرا کر بیچ کھاتا ہے
گلیم بوذر و دلق اویس و چادر زہرا!
دلق: خرقہ۔
گليم: گدڑی۔
حضور حق میں اسرافیل نے میری شکایت کی
یہ بندہ وقت سے پہلے قیامت کر نہ دے برپا

ندا آئی کہ آشوب قیامت سے یہ کیا کم ہے
‘گرفتہ چینیاں احرام و مکی خفتہ در بطحا’!
(کعبہ سے ہزاروں میل دور رہنے والے) اہل چین تو (عمرہ و حج کے لیے) احرام باندھے ہوئے ہیں (جب کہ ) اہل مکہ سو رہے ہیں۔
لبالب شیشہ تہذیب حاضر ہے مے ‘لا’ سے
مگر ساقی کے ہاتھوں میں نہیں پیمانہ ‘الا’

دبا رکھا ہے اس کو زخمہ ور کی تیز دستی نے
بہت نیچے سروں میں ہے ابھی یورپ کا واویلا
تيز دستي: مشاق و ہنرمند ہونا۔
اسی دریا سے اٹھتی ہے وہ موج تند جولاں بھی
نہنگوں کے نشیمن جس سے ہوتے ہیں تہ و بالا
موج تند جولاں: زور و شور سے اچھلنے والی لہر۔
نہنگ: مگر مچھ۔
غلامی کیا ہے ؟ ذوق حسن و زیبائی سے محرومی
جسے زیبا کہیں آزاد بندے، ہے وہی زیبا

بھروسا کر نہیں سکتے غلاموں کی بصیرت پر
کہ دنیا میں فقط مردان حر کی آنکھ ہے بینا

وہی ہے صاحب امروز جس نے اپنی ہمت سے
زمانے کے سمندر سے نکالا گوہر فردا

فرنگی شیشہ گر کے فن سے پتھر ہوگئے پانی
مری اکسیر نے شیشے کو بخشی سختی خارا

رہے ہیں، اور ہیں فرعون میری گھات میں اب تک
مگر کیا غم کہ میری آستیں میں ہے ید بیضا

وہ چنگاری خس و خاشاک سے کس طرح دب جائے
جسے حق نے کیا ہو نیستاں کے واسطے پیدا

محبت خویشتن بینی، محبت خویشتن داری
محبت آستان قیصر و کسری سے بے پروا

عجب کیا رمہ و پرویں مرے نخچیر ہو جائیں
‘کہ برفتراک صاحب دولتے بستم سر خود را’

وہ دانائے سبل، ختم الرسل، مولائے کل جس نے
غبار راہ کو بخشا فروغ وادی سینا

نگاہ عشق و مستی میں وہی اول، وہی آخر
وہی قرآں، وہی فرقاں، وہی یسیں، وہی طہ

سنائی کے ادب سے میں نے غواصی نہ کی ورنہ
ابھی اس بحر میں باقی ہیں لاکھوں لولوئے لالا

Comments are closed.

Blog at WordPress.com.

Up ↑

%d bloggers like this: